ОШ, 6-май – Sputnik. Алай районунун Корул айылында жергиликтүү жашоочулар тарабынан "бала уурдаганы келишти" деген шек менен сабалган жигиттердин жакындары Ош шаарында нааразычылык акциясына чыгышты. Бул тууралуу Sputnik Кыргызстан маалымат агенттигинин кабарчысы билдирди.
Маалыматка ылайык, алар Ош шаарынын борбордук аянтына тынчтык митингине чогулган.
Сабалган балдардын ата-энелеринин бири Чолпон Абдрахманова балдар тууралуу туура эмес маалымат таркап, алардын укугу тебеленгендигин айтты. Мындан тышкары, айрым массалык маалымат каражаттары балдардын ур-тепкиге алынганы тартылган видеону жүктөгөнүнө нааразы болду.
"Видео социалдык баракчалар аркылуу таркатылса да массалык маалымат каражаттары аркылуу жарыялангандыгы мыйзамсыз. Себеби жергиликтүүлөр балдардын тилин түшүнбөй, аларды тескерисинче ур-соккуга алып, жөнү жок жерден күнөөлөп жатышат. Анысы аз келгенсип, окуянын видеосун да таркатып жиберишти. Интернеттен бул видеону дүйнө жүзүндөгү адамдар көрүп олтурат. Биз күнөөсү жок балдарыбыздын себепсиз эле сабалышына, күнөөлөнүшүнө жол бербейбиз", — деди Абдрахманова.
Нааразычылык акциясы боюнча облустук милициянын маалымат катчысы Жеңиш Аширбаев аталган окуя Кылмыштардын жана жоруктардын бирдиктүү реестрине катталгандыгын билдирди.
Алай районунун Корул айылында жашаган үч жигит майып балдарды ур-тепкиге алгандыгы боюнча шектүү катары сурак берип жатат. Мындан сырткары, күбөлөрдөн да көрсөтмө алынууда.
"Майып балдардын унаасынын зыянга учурагандыгы боюнча да арыз түштү. Бул доомат да каралат", — деди Аширбаев.
Нааразычылык акциясына чогулгандар майып балдарды токмоктоого шектүүлөр тиешелүү жаза алуусун, келтирилген материалдык зыян калыбына келтирилишин жана кылмыш иши адилеттүү тергелүүсүн талап кылып, учурда таркап кетишти.
