БИШКЕК, 12-дек. — Sputnik. Аламүдүн райондук ички иштер бөлүмүнүн укук коргоочулары адам уурдоого шектелген кишини кармашты. Бул тууралуу Чүй ОИИББден маалымдашты.
Билдирмеге караганда, үстүбүздөгү жылдын 7-декабрында милицияга 32 жаштагы Д.М. аттуу киши кайрылып, төрт адамды жоопко тартууну суранган. Алардын экөөсүн тааный турганын билдирген.
"7-декабрь күнү саат 13.30да белгисиз адамдар жабырлануучуну Бишкектин көчөлөрүнүн биринен унаага зордоп салып, Аламүдүн районундагы талаага алып барышкан. Ал жактан аны сабап документке кол койдурууга аракеттенишкен",— деп айтылат маалыматта.
Кийин кылмышкерлер аны кое бергенден кийин жаран Аламүдүн райондук ички иштер бөлүмүнө арыз жазып кайрылган. Аталган факты боюнча Кылмыш-жаза кодексинин 123-беренеси ("Адам уурдоо") боюнча кылмыш иши козголгон. Кийинки күнү эле укук коргоочулар 27 жана 24 жаштагы эки шектүүнү колго түшүргөн. Экөө тең №1 тергөө абагына киргизилди. Учурда тергөө амалдары жүргүзүлүп калгандары изделип жатат.
