БИШКЕК, 7-май — Sputnik. Кыргызстандын Аалымдар кеңешинин төрагасы, Ислам университетинин мурдагы ректору Абдышүкүр Нарматов Sputnik Кыргызстан агенттигинин кабарчысына анын үйүнө жасалган уурулуктун чоо-жайын айтып берди.
Ал эми Нарматовдун айтымында, чоочун дабышты угуп калып, өзү чуркап чыккан. Болжол менен 100 метрдей аралыктан кийин, көчөдөн ууруларды кууп жетип, шыпыргынын сабы менен бирөөсүн башка бир чапкан.
"Жыгач сап сынып кетип, башка жеген киши жерге жыгылды. Андан кийин үйдөн уулум чуркап чыкты. Алар кармаша кетип, уурулардын бири травматикалык тапанчасын алып чыгып атканда, баламдын бутуна тийген. Учурда балам басып жүрөт, азыр футбол ойнойм деп кетти", — деп айтып берген Нарматов.
Ата-бала уурунун колун толгоп, милиция чакырган. Анын айтымында бул анын уулуна атайылап кол салуу эмес, акыркы мезгилдери алардын айылында күчөп бара жаткан кадимки эле уурулук көрүнүштүн бири.
