Түгөлбай Казаков: тажадым! Мумияны изилдегиси келсе казып алышсын

БИШКЕК, 17-окт. — Sputnik. Мумияны изилдемекпиз деп жаткан археологдор анчалык иштегиси келип жатса, кайра казып алсын. Бул тууралуу маданият, маалымат жана туризм министри Түгөлбай Казаков журналисттердин суроолоруна жооп берип жатып билдирди.

Эске салсак, 14-октябрда Баткен облусунун Кара-Булак айылындагы Мыктым-Гөр деген жерге IV-V кылымдарга таандык делген мумия жерге берилген. Ал 1960-жылдан бери борбордук тарых музейинде сакталып келген.

Министрдин айтымында, көмүлгөн мумиянын ким экендиги тууралуу так аныктама жок, андыктан жөн эле кишинин сөөгүн жакшылап изилдебей же көмбөй алып жүрө берүүгө болбойт.

"Беш жыл мурда да мумиянын чогултулган сөөктөрү министрликтин эле чечими менен жерге берилген. Анда эч ким ызылдап чыккан эмес. Ал эми азыр айрым адамдар жөн гана мени жумуштан алыш үчүн ушундай кадамдарга барып жатат. Мени атып же камап салса да мен бул чечимди туура деп эсептейм. Анткени адамдын сөөгү менен ойнобош керек, аны же жакшылап изилдеш керек, болбосо көөмп коюш керек. Мумияны музейге сактап койгон туура эмес, аны Илимдер академиясы алып изилдеш керек. Бул ишти ашырууга алардын же тийиштүү жабдыгы, же адистери жок болчу. Алар 60 жыл бул маселени карабай, качан аны көмгөндөн кийин ызылдап чыгып жатышат. Мен да тажадым. Кыйын болуп жаткан археологдор анчалык изилдегиси келсе, кайра казып алышсын. Мага эми баары бир", — деди Казаков.

Ал ошондой эле буга чейин мумияны изилдөөгө Илимдер академиясына көп жолу сунуш болгонун, бирок алар баш тартып келгенин кошумчалап кетти.