БАТКЕН, 14-окт. — Sputnik. Баткен облусунун Кара-Булак айылындагы Мыктым-Гөр деген жерге IV-V кылымдарга таандык делген мумия жерге берилди. Бул тууралуу аймактык кабарчы билдирди.
Маалыматка ылайык, бул мумия 1960-жылдардан бери борбордук тарых музейинде турган.
Кара-Булак айыл аймагынын башчысы Ачылбек Бекташевдин айтымында, мумия бүгүн эртең менен Баткенге алып келинген.
Маданият, маалымат жана туризм министрлигинин маалыматына ылайык, мумия табылган учурдан бери 60 жыл ичинде адистердин жана атайын жабдуулардын жетишсиздигинен эч кандай изилдөө иштери жүргүзүлгөн эмес. Мумия жакшы сакталып, бузулуп кетпеши үчүн бальзамдоо аракеттери да жасалган эмес.
Арты кайрылуу болсун. Архелодор казып алганча чирибей тур. Мактымхан pic.twitter.com/x7iyddcRxj
— KG Dad (@Sabyr_A) 14 октября 2017 г.
Андыктан келечекте окумуштуулардын аны кайра казып изилдөөсүнө мүмкүнчүлүк болсун деген шарт менен аны жерге көмүү демилгеленген.
"Кыргыз окумуштуулары аялдын мумиясын 1960-жылдары Кара-Булак айылынын Мыктым-Гөр аймагынан табышкан. Аны тарых музейине коюшуп, андан бери бир дагы генетикалык жана антропологиялык изилдөөлөр жасалган эмес. Андыктан бул аялдын мумиясы тууралуу эч кандай маалымат жок. Келечекте окумуштуулардын аны кайра казып изилдөөсүнө мүмкүнчүлүк болсун деген шарт менен жерге көмүлдү", — деди министрликтин маалымат кызматы.
Айрым маалыматтар боюнча мумия 4-5-кылымдарга таандык.
