БИШКЕК, 24-май — Sputnik. Алматы — Бишкек кан жолундагы кырсыктан каза болгон жарандын сөөгү туугандарынын коштоосу менен дүйшөмбү күнү, 23-майда кечинде Кыргызстанга алып келинди. Бул тууралуу Тышкы иштер министрлиги билдирди.
Эскерте кетсек, 23-майда таңкы саат 6.00дөр чамасында Алматы — Бишкек кан жолунда Ford Focus менен Honda Elysion үлгүсүндөгү жеңил унаалары кагылышып, анын кесепетинен жети адам каза болгон. Беш киши кырсык болгон жерде жан берсе, экөө ооруканага бараткан жолдо көз жумган.
Кыргызстандын Алматыдагы башкы консулдугу жабыркагандардын арасында КР жарандары жок экенин, бирок бирөө Казакстандын жарандыгын алган Баткендин 28 жаштагы тургуну экенин билдирген.
Буга чейин ӨКМ Казакстанда каза болгондордун бири Кыргызстандык жаран экенин маалымдаган.
