БИШКЕК, 27-авг. — Sputnik. Алдамчылык менен айыпталып жаткан ырчы Өмүрбек Жанышевдин (Омар) ишин Жогорку сот карап, биринчи вице-премьер-министр Тайырбек Сарпашевдин жана Калый Молдобасанов атындагы Кыргыз Улуттук консерваториянын ректору Муратбек Бегалиевдин берген кепилдиги менен өлкө аймагында эркин жүрүүгө уруксат берди. Бул тууралуу Жогорку Соттун маалымат кызматы билдирди.
Омар каймана аты менен таанымал ырчы Өмүрбек Жанышев алдамчылыкка шектелип, 22-июлда Талас райондук соту аны бир ай камакка алуу чечимин чыгарган. Бирок, Талас облустук сотунун сот коллегиясы 3-августта ишти карап, райондук соттун токтомун өзгөртүп, ырчынын кармалуусун мыйзамсыз деп тапкан. Анын баш коргоо чарасы катары эч жакка кетпөө тандалып, тергөө мезгилинде Талас облусунан сыртка чыгууга тыюу салынган.
ИИМдин билдирүүсүнө ылайык, Талас районунун тургуну Болот Бейшеналиев укук коргоо органдарына кайрылып, Бакай-Ата районунун тургуну Нуржан Токтогулов жана Өмүрбек Жанышев (Омар) андан 40 тонна төө буурчакты "акчасын кийин беребиз" деп алышканын айтып, бирок акчасын кайтарып бере электигин билдирген. Аталган факты боюнча 2015-жылдын апрель айында Кылмыш жаза кодексинин 166-беренеси ("Алдамчылык") боюнча кылмыш иши козголгон. 21-июлда шектелип жаткан Нуржан Токтогулов кармалып, убактылуу кармоо жайына бир айга камакка алынган.
