БИШКЕК, 3-авг. — Sputnik. Талас облустук соту Омардын баш коргоо чарасын өзгөртүү боюнча арызды карап, ырчыга карата сыртка чыкпоо чечимин кабыл алды. Ага ылайык, Омар тергөө бүткөнгө чейин Таластын аймагынан чыкпайт. Бул тууралуу укук коргоо органдарындагы булак билдирди.
ИИМдин билдирүүсүнө ылайык, Талас районунун тургуну Болот Бейшеналиев укук коргоо органдарына кайрылып, Бакай-Ата районунун тургуну Нуржан Токтогулов жана Өмүрбек Жанышев (Омар) андан 40 тонна төө буурчакты "акчасын кийин беребиз" деп алышканын айтып, бирок акчасын кайтарып бере электигин билдирген. Аталган факты боюнча 2015-жылдын апрель айында Кылмыш жаза кодексинин 166-беренеси ("Алдамчылык") боюнча кылмыш иши козголгон. 21-июлда шектелип жаткан Нуржан Токтогулов кармалып, убактылуу кармоо жайына бир айга камакка алынган.
Талас райондук сотунун өкүмүнөн кийин ырчынын жүрөгү кармап, облустук ооруканага жаткырылган. Учурда анын абалы туруктуу, ушул жумада ооруканадан чыгышы мүмкүндүгүн Талас облусунун биргелешкен ооруканасынын директору Шершенбек Жумашалиев билдирген.
