БИШКЕК, 3-авг — Sputnik. Ырчы Өмүрбек Жанышевдин (Омар) тарапташтары Талас облустук сотунун алдында ырчыны камактан чыгаруу талабы менен митинг өткөрүп жатышканын укук коргоо органдарындагы маалымат булагы билдирди.
Анын айтымында, сот имаратынын алдында ырчынын кесиптештери, күйөрмандары, айыл тургундары чогулуп турат. Алар Омардын камакта болушу анын ден соолугуна зыян келтириши мүмкүн экенин айтышууда.
"Бүгүн облустук сот Жанышевге баш коргоо чарасын өзгөртүүнү карайт. Аны бүгүн ооруканадан алып келишти", — дейт жеке булак.
Омар каймана аты менен таанымал ырчы Өмүрбек Жанышев алдамчылыкка шектелип, 22-июлда Талас райондук соту аны бир ай камакка алуу чечимин чыгарганы маалым болгон. Ага ылайык ырчы 26-августка чейин камакта болушу керек болчу.
Талас райондук сотунун өкүмүнөн кийин ырчынын жүрөгү кармап, облустук ооруканага жаткырылган. Учурда анын абалы туруктуу, ушул жумада ооруканадан чыгышы мүмкүндүгүн Талас облусунун биргелешкен ооруканасынын директору Шершенбек Жумашалиев билдирген.
