БИШКЕК, 1-авг. — Sputnik. Ырчы Омар кийинки жумада ооруканадан чыгышы мүмкүндүгүн Талас облусунун биргелешкен ооруканасынын директору Шершенбек Жумашалиев Sputnik агенттигине билдирди.
"Учурда бейтаптын абалы туруктуу. Бүгүн эле өзүм карадым. Кийинки жумада аны ооруканадан чыгаруу маселесин карайбыз", — деди ал.
Ырчы Омарга "туруктуу эмес стенокардия" диагнозу коюлган. Мындай диагноз менен камакка алса болор болбосун сотмедэкспертизанын чечими менен белгилүү болорун Жумашалиев билдирди.
ИИМдин билдирүүсүнө ылайык, Талас районунун тургуну Болот Бейшеналиев укук коргоо органдарына кайрылып, Бакай-Ата районунун тургуну Нуржан Токтогулов жана Өмүрбек Жанышев (Омар) андан 40 тонна төө буурчакты "акчасын кийин беребиз" деп алышканын айтып, бирок акчасын кайтарып бере электигин билдирген. Аталган факты боюнча 2015-жылдын апрель айында Кылмыш жаза кодексинин 166-беренеси ("Алдамчылык") боюнча кылмыш иши козголгон. 21-июлда шектелип жаткан Нуржан Токтогулов кармалып, убактылуу кармоо жайына бир айга камакка алынган.
