БИШКЕК, 8-май — Sputnik. Кыргызстанда коронавирус жуктурган 12 адамдын абалы оор, анын ичинен алтоо жандандыруу бөлүмүндө жатат. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.
Анын айтымында, учурда ооруканаларда жалпысынан 244 киши жатат.
“Оор абалдагы бейтаптардын саны 12 болсо, анын ичинен жандандыруу бөлүмүндө алтоо бар. 164 бейтаптын абалы канааттандырарлык болсо, 68 киши орточо оор абалда”, — деди Үсөнбаев.
Бүгүнкү күндө коронавирус аныкталган 906 учур катталды. 650 бейтап айыгып, үйүнө чыгарылды. Анын ичиндеги 226 медицина кызматкеринин 163ү сакайып ишине кайткан.
Ушу тапта Кыргызстанда абал кандай болуп жатканын Sputnik агенттиги жүргүзүп жаткан тексттик баяндамадан билүүгө болот.
