Касымбекова: "Сынган кылычты" бир койго сатып алып окугандар болгон
"Сынган кылыч" биринчи басылганда 80 миң нуска менен чыгып, үч айга жетпей элге тарап сатыкта түгөнүп калыптыр. Ошондо бири-биринен сурап окуп, ал тургай бир койго сатып алып окуган адамдар болгон экен. Бул тууралуу Элмира Касымбекова Sputnik Кыргызстан радиосунун "Туяк" программасында маек куруп жатып билдирди.
Анын айтымында, жазуучу аталган чыгарманы 26 жашында баштап, 74 жашында "Кыргын" деген роман менен жыйынтыктаган.
"Ар кандай тирештерге карабастан "Сынган кылыч" чыгып кеткен. Мага айтып бергенине караганда, биринчи басылганында эле китеп 80 миң нуска менен чыгып, үч айга жетпей сатылып бүткөн. Ал учурда мындай көп нускада чыккан чыгарма болбоптур. Окурмандар китепти издеп, бири-биринен алып окушчу. Такыр табылбай калганда бир койго сатып алган учурлар болгон экен. Ал кезде китептин баасы 1 рубль 20 тыйындын тегерегинде болсо, койдун наркы 60-70 рубль турчу. Китепти Зоя Кедрина орусчага которгондон кийин ал аябай популярдуулукка ээ болгон. Бул китепке жазуучу өмүрүн арнаган. Ошондуктан жанагы сегиз томдугунун баш сөзүндө "калемим да картайып карып калды" деп жазып жатпайбы. Кийин "тарых миң кырлуу, мен ошонун бир гана тамырына кирип, ошого өмүрүм жетпей жатат" деп өкүнөр эле", — деди Касымбекова.
Ошондой эле ал чыгарма ушул күнгө чейин популярдуулуктан түшпөй келгенинин себеби анын тарыхтагы чыныгы окуялар менен коштолгонунда деген пикирин кошумчалады.
