БИШКЕК, 22-мар. — Sputnik. "Коопсуз шаар" долбоорун ишке ашыруунун алкагында пилоттук "112" уюлдук тиркемеси тесттик режимде ишке киргизилип жатканын өкмөттүн маалымат кызматы билдирди.
Маалыматта Өзгөчө кырдаалдар министрлиги тарабынан иштелип чыккан пилоттук "112" уюлдук тиркемесин Google Play аркылуу жүктөп алууга болору айтылган. Тиркеме азырынча Android операциялык тутумунун базасындагы жабдууларда иштейт.
Тиркемени иштеп чыккандардын айтканы боюнча кырсыктарга жана коомдук тартипти бузууларга күбө болгон ар бир жаран сүрөт, аудио жана видеоматериалдарды тартып алып, аларды "112" линиясына билдирүү аркылуу жөнөтөт.
"Өзгөчө кырдаалдар министрлиги билдирүүнү алган соң жарандын билдирүүсүн алгандыгы жана мыйзамда көрсөтүлгөн тартипте тиешелүү чаралар көрүлгөнү, ошону менен бирге кайрылууга жооп берүүгө милдеттүү орган тууралуу жаранга кабарлоого тийиш. Жоруктар жана укук бузуулар боюнча кайгуул кызматтары жерине баруу менен ыкчам жооп кайтарышат", — деп белгиледи Өзгөчө кырдаалдар министрлигинин ыкчам жооп кайтаруу башкармалыгынын башчысынын орун басары Айбек Картайганов.
Белгилей кетсек, тесттик ишке киргизүүнүн жыйынтыгы менен тиркеменин иши туураланып, андан соң уюлдук тиркеме толук кандуу колдонууга берилет.
