БИШКЕК, 18-апр. — Sputnik. Ош шаарындагы Ак-Буура дарыясынын жээктерине чогулуп кеткен таштандыларды тез арада алып чыкпаса, жугуштуу оорулардын күчөп кетүүсүнө алып келүүсү мүмкүн. Бул туурасында Мамлекеттик экологиялык жана техникалык коопсуздук боюнча инспекциясынан кабарлашты.
"Таштандынын арасында мал-жандыктардын тарпы ирээтсиз ташталып кеткен. Жергиликтүү бийлик өкүлдөрү бир нече жолу эскертүү, түшүндүрүү иштери жүргөнү менен, айрым айылдык аймактар инспекторлордун койгон талаптарын тоготпой келет", — деп айтылат маалыматта.
Маалыматта аталган инспекциянын адистери Ак-Буура дарыясынын жээгиндеги акыр-чикирди тазалабаганы үчүн "Сулайман-Тоо – 3" аймактык кеңешинин жетекчилигине мыйзам чегинде катуу чара көрүү үчүн материалдарды даярдап жатканы айтылган.
Буга чейин Бишкектин түштүк тарабында тоону көздөй кеткен тараптагы "Кара-Булак" этнокомплексине жакын жер таштандыга көмүлгөн видео тараган.
