БИШКЕК, 29-мар. — Sputnik. Башкы чалгындоо башкармалыгынын мурдагы офицери Сергей Скрипаль менен кызы өз үйүндө ууландырылганын РИА Новости агенттиги Скотланд-Ярдга таянуу менен билдирди.
Полициянын маалыматына ылайык, адистер уулуу заттын ири көлөмдөгү концентраты Скрипалдын үйүнүн сырткы эишигинен, ал эми токсиндин калдыктары турак жайдын аймагынан да табылган. Укук коргоо органдары такай болуп жаткан текшерүүдөн Сергей Скрипалдын кошуналары кооптонбой эле койсо болорун белгилеп, уунун калдыктары өмүргө коркунуч жаратпайт деп ишендиришти.
Кийин Уилтшир графтыгынын полиция башчысынын орун басары Пол Миллс криминалисттер беш миңден ашык видео жазууну жана миңден ашык далил катары алынган нерселерди изилдеп чыгышы керектигин айтты. Ал ошондой эле тергөө бир канча айга созулушу ыктымалдыгын кошумчалады.
Ууландыруу чырынын арты менен Британиянын бийлиги өлкөдөн 23 россиянын дипломатын чыгарууну чечип, Россия менен болгон жогорку деңгээлдеги байланыштарды токтоткон. Москва да ошондой эле жооп кайтарып, Британиянын 23 дипломатын өлкөдөн чыгаруу чечимин кабыл алып, Санкт-Петербургда консулдук ачуу боюнча уруксатты чакыртып алган. Андан сырткары, Британ кеңешинин иши токтотулду.
Кийин Улуу Британиянын демилгесин 20дан ашык мамлекет колдоп, алар да элчилерди чыгарарын айткан.
Россиянын Тышкы иштер министрлиги бул кадамды чагымчыл аракет деп сыпаттады.
