БИШКЕК, 17-май — Sputnik. Анжиан облусунун Шахрихан районунда кишилер массалык түрдө ууланганын облустун жетекчилиги Sputnik Өзбекстан маалымат агенттигине тастыктап, каза болгондор дагы бар деген маалыматты төгүндөдү.
Ага ылайык, 15-майда Тез жардам кызматына жергиликтүү тургундардан сегиз телефон чалуу түшкөн. Бардыгы жүрөгү айланып, кусуп, ичи өтүп жана дене табы көтөрүлүп кеткенин айтышкан. Кайрылгандардын бал муздак жегени аныкталган.
Окуя болгон жерге милиция менен санитардык эпидемиологиялык көзөмөл борборунун кызматкерлери барып, кафе жана бал муздак саткан жерлерди жапкан. Медициналык жардам сурап кайрылгандардын саны 186 кишиге чейин жеткен. Учурда абал тынч, буга чейин кайрылгандардын 114ү үйүнө чыгарылган. Калгандарына тийиштүү жардамдар көрсөтүлүүдө.
Окуянын чоо-жайын укук коргоо органдары менен тийиштүү тараптар териштирүүдө.
