БИШКЕК, 24-дек. — Sputnik. Тарых жана маданият жылына, ошондой эле 1916-жылдагы улуттук боштондук үчүн күрөштүн 100 жылдыгына карата тартылган Мухтар Атаналиевдин "Үркүн" тасмасы ушул аптада Түркиянын Стамбул шаарында көрсөтүлдү. Бул тууралуу Sputnik Кыргызстан агенттигине тасманы алып барган делегациянын мүчөсү Элвира Акимова билдирди.
Анын айтымында, иш чара "Түрк дүйнөсүнүн биримдиги" муниципалитетинин башкы катчысы Фахри Солак, Түрк Дүйнөсү борборунун жетекчиси Абдулметин Кескиндин жана түркиялык кыргыздардын маданият жана көмөктөшүү фондусунун колдоосу менен ишке ашты.
Тасмадан тышкары, Чолпон-Ата шаарындагы Ысык-Көл мамлекеттик тарыхый-маданий корук-музейинин жетекчиси Гүлүм Алымкожоева тарабынан көчмө көргөзмө уюштурулуп, мекендештер Үркүн темасына арналган сүрөттөргө күбө болушту.
Маалыматка караганда "Үркүн" 1916-жылдагы улуттук-боштондук кыймылын чагылдырган алгачкы тасма болуп, анын бюджети 17,5 миллион сомду түзгөн.
