БИШКЕК, 21-дек. — Sputnik. Кыргызстандын атактуу кинорежиссеру Актан Арым Кубаттын "Кентавр" тасмасы Германиядагы беделдүү Берлин эл аралык кинофестивалына чакырылды. Бул туурасында Кинематография департаментинен кабарлашты.
Фестиваль келерки жылдын февраль айына белгиленген. Кыргызстандык тасма дал ушул күнү дүйнө коомчулугуна сунушталат.
"Бүгүн Берлин шаарында аталган фестивалдын расмий маалымат жыйыны өтүп, анда кино картинанын "Панорама" программасына чакырылгандыгы кабарланды. Адатта ага кабыл алынган түшүнүктөргө каршы келген жана салттуу эмес эстетикалык стиль менен тартылган тасмалар чакырылат", — деп айтылат билдирүүдө.
Жыл сайын өтүүчү бул киномайрамга 3000ге чукул кинотасма катышууга арыз берип, бирок мыкты деп тандалып алынгандары гана катышуу укугуна ээ болот. Бул кинофестиваль 1951-жылдан бери Канн жана Венеция фестивалдары менен кошо өткөрүлүп келет.
"Тасманы дүйнөлүк рынокко алып чыгууну The Match Factory дистрибьютордик компания колуна алмай болду. Ал буга чейин Европадагы ири жана ийгиликтүү иштеп келген дистрибьютордик уюм", — деп билдиришти Кинематография департаментинен.
"Кентавр" — өз элинин улуттук баалуулуктарынын сакталып калышына жан үрөгөн адам тууралуу тасма.
Фильмде Актан Арым Кубат башкы ролду ойнойт. Мындан тышкары, тасмага Болот Тентимишов, Таалайкан Абасова, Зарема Асаналиева, Илим Калмуратов тартылган.
