БИШКЕК, 14-сен. — Sputnik. "Кыргызстан" фракциясынын жетекчиси Канат Исаев Жогорку Кеңештеги көпчүлүк коалициянын лидери болгонун "Өнүгүү — Прогресс" фракциясынын башчысы Бакыт Төрөбаев билдирди.
Бирок эл өкүлдөрүнүн ортосунда кызыл чеке талаш-тартыш жаралып, Конституцияга киргизиле турган өзгөртүүлөр туурасында фракция лидерлери кайым айтыша кетти. КСДП фракциясынын лидери Иса Өмүркулов "Ата Мекен" жана "Өнүгүү — Прогресс" фракцияларына Баш мыйзамга өзгөртүү киргизүү боюнча каршы пикирлери болсо коалициядан чыгып кетүүгө укугу бар экенин эскерткен.
Төрөбаевдин демилгеси менен бүгүн кечке жуук фракция лидерлери ийри отуруп түз кеңешүүгө чогулган. Жабык эшик алдында өткөн жолугушуунун жыйынтыгы тууралуу Төрөбаев билдирди.
"Канат Исаев коалициянын лидери болду", — деди депутат.
Ал эми жаңы дайындалган Исаев коалиция төрагалыгы талашка түшкөн Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитеттин башчылыгына Тынчтыбек Шайназаров менен Асел Кодуранованын талапкерлигин көрсөтүлөрүн белгиледи. Ал референдум маселеси боюнча консенсуска келүү зарыл экенин кошумчалады.
