БИШКЕК, 14-сен. — Sputnik. Эгерде пикирлер келишпесе, анда коалициядан чыгуу керек. Бул тууралуу КСДП фракциясынын лидери Иса Өмүркулов парламентте сүйлөп жатып билдирди.
Сөз кезегин алган "Өнүгүү — Прогресс" фракциясынын лидери Бакыт Төрөбаев буга чейин КСДП кеңешпей туруп Асел Кодуранованын талапкерлигин алып чыкканын айтып, коалиция болгон соң кеңешип чечим чыгарууга чакырды. Муну менен бирге комитеттин төрагалыгына "Өнүгүү — Прогресстин" депутаты Тынчтыкбек Шайназаровдун талапкерлигин көрсөттү.
"Буга чейин Конституцияны өзгөртүү демилгесин көтөргөнүбүздө айрымдар колдогон жок. Мына азыр да комитет төрагасын шайлоо учурунда "Өнүгүү — Прогресс" фракциясынын лидери менен пикир келишпестиктер болуп жатат. Андай болсо коалициядан чыгуу керек", — деди Өмүркулов.
Ал эми "Бир Бол" фракциясынын депутат болуп келген Мыктыбек Абдылдаев сентябрь башталары менен талаштар күчөп жатканын, коалиция болгон соң ачууга алдырбай кеңешүүгө чакырды.
