БИШКЕК, 14-сен. — Sputnik. Коалицияга түнү менен бата тартылып кеткен учурлар болгон, бүгүн ынтымак менен иштей турган мезгилде оюнга алдырбашыбыз керек. Мындай пикирин ЖКнын бүгүнкү жыйынында КСДП депутаты Кожобек Рыспаев айтты.
Андан сырткары, Конституцияга киргизиле турган өзгөртүүлөр туурасында фракция лидерлеринин ичинен каршылары сын-пикирлерин айтса, жактагандар ал зарыл деген ойлорун билдирди.
Кезеги келген депутат Рыспаев фракция лидерлерине сөз ыргытты.
"Бир комитеттин төрагасын шайлай албай ушул жерге алып чыгып жатсак, төрт лидер чогулуп алып сүйлөшө албасаңар, анда эмнеси коалиция", — деди ал.
Ал фракция лидерлери коалициядан чыкпайбыз дегени менен, тагдырлар түн ичинде эле чечилип калган учурлар болгонун айтып, депутаттарды ынтымактуу болууга чакырды.
"Тарыхты айталы, кимдер чыкканы эсте. Жантөрө Жолдошевич (ал кездеги премьер-министр Жантөрө Сатыбалдиев) "эртең сүйлөшүп алам" деп, бирок коалиция кантип ыдырап кеткенин билбей калган. Эртең менен турса, түнү менен сүйлөшүүлөр жүрүп, коалицияга бата кылынып калыптыр. Аны Өмүрбек Чиркешович жакшы билет. Бүгүн ынтымак менен иштей турган мезгилде оюнга алдырбашыбыз керек",— деди Рыспаев.
"Бизди эмне деп гана жазышкан жок. Өзүңөр көрдүңөр, депутаттарды Көчмөндөрдүн оюндарына автобуска салып чурулдатып жеткирип койду. Ал эми өкмөт машина менен кирип жатты, бизди "издеваться" этип. Анда баарына бирдей кылсын, бирдей укук менен барсын",— деди эл өкүлү Рыспаев.
Бүгүн узакка созулган жайкы жана андан кийинки эс алуулардан кийин ЖКнын пленардык жыйыны өтүп жатат.
