БИШКЕК, 8-июл. — Sputnik. Көз карандысыз мамлекеттердин шериктештигине мүчө өлкөлөр туризмди биргеликте өнүктүрүүгө кызыкдар экенин маданият, маалымат жана туризм министринин орун басары Азамат Жаманкулов журналисттерге билдирди.
Эске салсак, Бишкекте аталган биримдикке мүчө мамлекеттердин туризм боюнча кеңешинин жыйыны өтүп жатат.
Жаманкулов эки күнгө созулган жыйында айрым мамлекеттер өздөрүнүн туризмди өнүктүрүү боюнча жасап жаткан аракеттери тууралуу айтып бергенин белгиледи.
"Жыйында КМШ мамлекеттеринде туризм кандай өнүгүп жатканын талкуулап, кайсыл мамлекетте туризмдин кайсыл тармагы алдыга кетип жатканы тууралуу пикир алмаштык. Мисалы Белорусия агротуризм боюнча өзүнүн мисалын айтып берсе, Өзбекстан тарыхый жайларды өнүктүрүү боюнча тажрыйбасы менен бөлүштү", — деди ал.
Министрдин орун басары Орто Азия аймагында туризмди өнүктүрүү боюнча бир катар коңшу мамлекеттер туристтик маршруттарды бир пакет менен сатуу боюнча сөз болгонун айтты.
Жаманкулов 2015-жылы Кыргызстанга 4 миллионго жакын чет элдик жаран келип кеткенин кошумчалады.
Бүгүн аяктай турган жыйын соңунда өз ара кызматташуу боюнча протоколго кол коюлмакчы.
