БИШКЕК, 28-янв. — Sputnik. Индиянын Бангалуру шаарында бүгүн башталган VIII Эл аралык кинофестивалы Азия, Индия жана Каннар (Индиянын түштүк-батышында жайгашкан Карнатака штатынын эли) тасмасы болуп үч категорияда өтөт. Бул тууралуу аталган фестивалдын расмий сайтында айтылган.
Эскерте кетсек, Кыргызстандан бул иш-чарага режиссер Дальмира Тилепбергенованын "Асман алдында" тасмасы катышууда. Кыргызстандык фильм 1-февралда калыстар тобунун сынына коюлуп, Азия тасмаларынын сынагында ат салышат.
Эл аралык кинофестиваль үстүбүздөгү жылдын 4-февралына чейин уланат.
Сүйүү, жоготуу, ишеним тууралуу бул тасма Төлөмүш Океев атындагы "Кыргызфильм" улуттук киностудиянын базасында кинематография департаментинин колдоосу менен бир жыл аралыгында тартылган. Жалпы бюджети 6,5 миллион сом.
Башкы ролдорду Жамал Сейдакматова, Таалайкан Абазова, Анвар Осмоналиев, Нуржигит Канаев, Мунара Дооронбекова, Асан Амановдор ойногон.
