БИШКЕК, 19-янв. — Sputnik. Жалал-Абаддын Сузак районунда алгачкы ирет тоо лыжа борбору ачылды. Эс алуу борбору деңиз деңгээлинен 1400 метр бийиктикте, Жалал-Абад шаарынан 30 чакырым алыстыктагы "Маркай" жергесинде жайгашкан.
Эс алуу аймакта үч трасса салынган — 450 жана 250 метр узундуктагы лыжа тебүүчүлөр үчүн жана үчүнчүсү чана менен скейтборд сүйүүчүлөр үчүн узундугу 150 метрге жеткен трасса. Тоого чыгуу үчүн тегизделген жана жарыктандырылган канат жолдору курулган.
Борбордун кызматкери Асылбек Жумашевдин айтымында, тоо лыжа борбору 16-декабрда ачылганы менен эми гана толук кандуу иштей баштады.
"Эрте эле ачсак болмок, бирок кардын аздыгы жолтоо болду. Алдыда дагы бир нече лыжа трассаларын ачууну пландап жатабыз", — дейт Жумашев.
Анын айтымында, облуста күн жылуу болгондуктан кар көпкө кармалбайт, кээ бир жерлерде чөп жашылдана баштады. Бирок тоо боорунда айырмачылык билинип, Көк-Жаңгакта аба ырайынын жылуу болгонуна карабастан кар бар. Мурун бул аймакта жеригликтүү администрация кызматкерлери жана ар кыл уюмдар кышкы кар оюндарын өткөрүп, жергиликтүү жарандар целлофан каптар менен жылгаяк тебишчү.
"Күзүндө даярдык иштери башталат. Таштар терилип, жарык берүүчү жабдыктарды устундарга орнотуп, канаттар жайгаштырылат. Бул ишибизди экологдор да баалашууда, анткени биз дарактарды кыйбастан, тескерисинче, жаш көчөттөрдү отургузууга ниеттенип жатабыз", — дейт үйрөтүүчү.
Ал "Маркай" тоо лыжа борборунун чектелген шарттарына карабастан, кышкы спорт сүйүүчүлөрүнүн саны өсүүдө. Лыжа жолдорун жарыктандыруу жакшы болгондуктан, борбор күндүр-түндүр иштеп жатат.
