БИШКЕК, 9-янв. — Sputnik. Түркия кыргыз тарапка виза режимин киргизе турганы боюнча расмий маалымдай элек. Бул тууралуу тышкы иштер министрлигинин расмий өкүлү Нурлан Суеркулов Sputnik Кыргызстан маалымат агенттигине билдирди.
Эске салсак, Түркия качкындар маселесин чечүү үчүн Европа биримдиги менен шерттешкен келишимдин негизинде июнь айынан тарта 89 мамлекет менен болгон визасыз режимди жокко чыгарат деген маалымат таратылууда. Бул мамлекеттердин катарында Кыргызстан, Казакстан, Түрмөнстан, Иран, Россия баштаган 89 өлкө бар.
Түркиянын маданият жана туризм министрлигинин маалыматы боюнча январь-ноябрь айларында Түркияга бул мамлекеттердин 10 миллионго жакын турист келген. Ал эми бул убакыт ичинде Түркияга келген туристтердин жалпы саны 34,8 миллион кишини түзгөн. Эми бул туристтердин 30 пайызы өлкөгө кирүү үчүн виза алууга мажбур болот.
