БИШКЕК, 9-янв. — Sputnik. Европа биримдиги менен түзүлгөн келишимдин негизинде Түркия ЕБ виза киргизген мамлекеттерге виза режимин киргизиши керектигин Sputnik Türkiye маалымат агенттиги билдирди.
Түркия туризм жана соода сатыкты жандандыруу үчүн түрк тилдүү мамлекеттерге, орто чыгыштагы бир катар мамлекеттерге белгилүү бир мөөнөткө чейин визасыз режимди киргизген. Мындай режим 89 мамлекетке иштеп келген. Эми бул мамлекеттин тургундары июнь айынан тарта виза менен кирип, чыгып калышат.
Түркиянын маданият жана туризм министрлигинин маалыматы боюнча январь-ноябрь айларында Түркияга бул мамлекеттердин 10 миллионго жакын турист келген. Ал эми бул убакыт ичинде Түркияга келген туристтердин жалпы саны 34,8 миллион кишини түзгөн. Эми бул туристтердин 30 пайызы өлкөгө кирүү үчүн виза алууга мажбур болот.
Азырынча Кыргызстан менен Түркиянын ортосунда виза режимин киргизүү боюнча түрк тараптан билдирүү келе электигин КР өкмөтү билдирүүдө. Эки мамлекет ортосундагы келишим боюнча Кыргызстандын жарандары Түркиянын аймагында 90 күнгө чейин визасыз жүрө алат.
