БИШКЕК, 5-янв. — Sputnik. Казакстандагы керектөөчүлөрдүн укугун коргоочу комитет Караганды облусунда кондитердик таттуулардын курамын текшерген. Жыйынтыгында үч компаниядан көгөрүп кеткен продукциялар табылган. Алардын катарында Кыргызстанга продукциясын экспорттоочу АК "Рахат" фирмасынын момпосуйлары дагы бар.
Кыргызстан импорттогон "Рахат" момпосуйларына жарандар тарабынан даттануулар түшкөн же түшпөгөнүн билүү үчүн Өкмөттүн монополияга каршы мамлекеттик агенттигине кайрылдык.
Агенттикке караштуу керектөөчүлөрдүн укугун коргоо бөлүмүнүн адиси Зарина Калмуратованын айтымында арыз түшкөн фирмалардын аталышы жарыялоого берилбейт.
"Кыргызстандын мыйзамы боюнча кайсы фирманын продукцияларына көп арыз түшкөнү тууралуу маалымат жарыяланбайт", — дейт Калмуратова.
Анын айтымында Кыргызстанда таттууларга караганда сүт азыктарына даттануулар көп түшөт.
"Продукциялардын упаковкасында көрсөтүлгөн мөөнөтүнөн өтө элек болсо дагы көгөрүп кеткен учурлар катталат. Мындай учурда биз ишканага эскертүү кагазын жөнөтөбүз. Алар биз берген мөөнөттүн ичинде жараксыз продукцияларын жок кылууга тийиш", — дейт Калмуратова.
Ал эми коңшу Казакстандагы "Рахат" фирмасы боюнча катталган фактыга таянуу менен фирмага мөөнөтсүз текшерүү жүргүзүү мүмкүн эмес. Себеби, Кыргызстандын мыйзамы боюнча текшерүүгө алуу үчүн сөзсүз түрдө жарандардан арыз түшүүсү керектелет.
