БИШКЕК, 6-сен. — Sputnik. Вахдатта кырдаал тынч, бардык соода түйүндөрү, базарлар иштеп жатат. Эл кадимки күнүмдүк тиричилигин көрүүдө дейт кечээ Sputnik менен телефон аркылуу маегинде шаар тургуну Фаррух Мирзоев.
Тажикстандын борбору Душанбеде жана Вахдат шаарында жума күнү ИИМ менен Коргонуу министрлигинин кызматкерлерине кол салынган. Кагылышуу учурунда 33 күч кызматкери каза таап, мыйзамсыз топтун 9 мүчөсү өлтүрүлгөн.
Агенттиктин маектешинин айтымында, коопсуздук чарасы күчөтүлгөнүн далилдей турган милициялык күзөт же посттор шаардын өзүндө жок.
"Мен 4-сентябрда таңга маал, саат бештерге жакын тарсылдаган үндөрдү уккам, бирок эч маани берген эмесмин. Шаардын милициясына кол салышканын кийин билдим", — деди Мирзоев.
Рамит капчыгайына жакын жерде (Вахдат району) жума күнү Вахдат шаарынын ИИМ бөлүмүнө куралдуу кол салган топту жок кылуу боюнча атайын операция жүрүп, ал түнгө чейин уланды дейт ал.
Кылмышкерлерди издеп, Вахдаттын тургундарынын үйлөрүн милиция тинтип жүрөт деген маалыматты Мирзоев ырастаган жок.
"Бул болбогон кеп, эч ким тинтпей эле турат, баары өзүнүн күнүмдүк оокаттары менен эле алек", — деди ал.
Күч түзүмдөрүнүн маалыматына ылайык, кол салууну мурдагы Коргоо министринин орун басары, өткөн жума күнү "жасаган кылмыштары үчүн" президент тарабынан кызматынан алынган Абдухалим Назарзода жетектеген.
