БИШКЕК, 28-июль — Sputnik. Тергөө учурунда такталгандай, Өмүрбек Жанышев таанышы менен (Нуржан Токтогулов – ред.) таластык дыйкандан чындап эле төө буурчак алган. Бул туурасында ИИМдин маалымат кызматы билдирди.
Дүйшөмбү күнү 27-июлда Омар Талас РИИБдин тергөө бөлүмүнө алынып келип, адвокатынын көзүнчө суракка алынган. Ал алдамчылык беренеси боюнча шектелип, убактылуу кармоо жайына камалган.
Талас районунун тургуну Болот Бейшеналиев укук коргоо органдарына кайрылып, Бакай-Ата районунун тургуну Нуржан Токтогулов жана Өмүрбек Жанышев андан 40 тонна төө буурчакты "акчасын кийин беребиз" деп алышканын айтып, бирок акчасын кайтарып бере электигин билдирген. Аталган факты боюнча 2015-жылдын апрель айында Кылмыш жаза кодексинин 166-беренеси ("Алдамчылык") боюнча кылмыш иши козголгон.
21-июлда шектелип жаткан Нуржан Токтогулов кармалып, убактылуу кармоо жайына камакка алынып, сот аны бир айга камакка алуу чечимин чыгарган.
Омардын продюсери ырчынын атын сатып, аны жаманатты кылып жатышканын айткан.
Ошондой эле, бир катар ырчылар Омардын өлкөдөн чыгып кетпесине кепилдик беребиз деп кол топтошууда.
