БИШКЕК, 10-июль — Sputnik. Президент Алмазбек Атамбаев ШКУ алкагында пландалган эки тараптуу жолугушууларга катышпай турган болду. Бул туурасында президенттин маалымат катчысы билдирди.
Өлкө башчынын агасы Калыйбек Шаршенов 64 жаш курагында дүйнө салды. Сөөк коюу зыйнаты бейшемби күнү, Чүйдүн Арашан айылында өттү. Бул кайгылуу окуядан улам, сөөктү койгондон кийин, Атамбаев ШКУнун Уфада өтө турган саммитине пландалгандан кечирээк барды.
"Президент ШКУга мүчө өлкөлөрдүн жетекчилеринин отурумунан кийин дароо Бишкекке келет, ал мурдараак пландалган эки тараптуу жолугушуулардын бардыгын токтотту", — деп билдирди маалымат кызматтын өкүлү.
Саммиттин алкагында Атамбаевдин Афганистан жана Ирандын президенттери менен жолугушуусу пландалган эле.
ШКУга Россия, Кытай, Казакстан, Кыргызстан, Тажикстан жана Өзбекстан мүчө. Ал Афганистан, Индия, Иран, Монголия жана Пакистан байкоочулук сатуска ээ.
Былтыр сентябрда Пакистан менен Индиядан аталган уюмга кирүү боюнча арыз түшкөн. Буга чейин Россия мамлекет башчысынын жардамчысы Юрий Ушаков Индия менен Пакистандын ШКУга кирүүсүнө убакыт керектигин, алардын мүчөлүгү Индияда өтө турган саммитте толук чечилерин айткан.
