БИШКЕК, 22-янв — Sputnik. КРдин Дене тарбия жана спорт боюнча мамагенттигинде коллегия болуп, анда мекеменин 2015-жылга карата иштеринин планы аныкталганын агенттиктин маалымат кызматы билдирди.
Быйылкы иш-чаралардын катарына: Кыргызстанда дене тарбия спорт кыймылынын уюшулганына 90 жылдыгы болот, ага президент катышат. Ошондой эле, укук коргоо жана күч органдарынын кызматкерлеринин күч даярдыгы боюнча инструкция иштеп чыгып, аны бекитүү каралган. 2015-жылы спортту жайылтуу максатында мамлекеттик 15 мекемеге дене тарбия көнүгүүлөрү сынамак долбоор катары киргизилет.
Ошондой эле, премьер-министр Жоомарт Оторбаев тарабынан Кааба уулу Кожомкул атындагы спорт сарайындагы бассейндин метариалдык-техникалык базасын жакшыртуу жана оңдоо үчүн инвестиция тартуу тапшырмасы коюлган. Учурда бул багытта иштер жасалууда.
