Россия санкцияларга солк эткен жок: экономиканын туруктуулугунун сыры эмнеде?
19:05 28.09.2026 (Жаңыртылды: 15:35 29.09.2026)
© Фото / Асел Сыдыкова
Жазылуу
Стратегиялык соода өнөктөш болгон Россиянын экономикасы түздөн-түз Кыргызстандын экономикасына да таасир этет. Ошондуктан РФтин экономикалык бакубатчылыгы биз үчүн абдан маанилүү.
“Экономикалык панорама” уктуруусунда экономист-изилдөөчү Улукман Мамытов Россияга Совет мезгилинен тартып эле батыш тарабынан санкциялар салынып келгенин эске салды. Ал эми 2022-жылы Россия Украинада атайын аскердик операция баштагандан бери чоң-кичине болуп, жалпысынан 20 миңден ашык санкция киргизилген.
"Ошол учурда көпчүлүк Россиянын экономикасы кыйрайт деген ойдо эле. Бирок ал туруктуулугун көрсөтүп, олуттуу өзгөрүүгө дуушар болгон жок. Мунун бир себеби — Россия санкцияларга көнүп калган. Тескерисинче, өлкөнүн экономикасында өсүш байкалууда. Рублдин курсу да бекемделип, учурда 1 доллар 70–80 рублдин айланасында болууда. Мындан тышкары, Россияда валюталык операцияларга чектөөлөр киргизилген. Башкача айтканда, мурдагыдай валютанын өлкөдөн сыртка эркин чыгышынае мүмкүнчүлүк жок. Бул да рублдин бекемделишине таасир эткен факторлордун бири. Нефть жана газ экспорттогон "Роснефть", "Газпром" сыяктуу компаниялар киреше тапкан учурда, түшкөн валютанын дээрлик 80 пайызы ички рынокко сатылышы керек деген талап бар. Демек, ички рынокто валюта көбөйгөн сайын ага болгон суроо-талап да төмөндөйт. Бул өз кезегинде рублдин курсун бекемдөөгө шарт түзөт. Россиянын соода балансы дайыма позитивдүү, башкача айтканда, профицит менен жабылат", — деди Мамытов.
Экперт өлкөнүн экспорт жана импортуна токтолуп, мунай, газ, буудай жана башка товарларынын баа-баркына токтолду. Анын айтымында, дагы бир маанилүү жагдай — Россиянын Борбордук банкынын акча-кредит саясаты экенин белгиледи.
