Салыкчылар эми курал менен жүрүшү мүмкүн. Токтом долбоорунун чоо-жайы
© Фото / пресс-служба кабинета министров КР
Жазылуу
БИШКЕК, 9-окт. — Sputnik. Министрлер кабинети Салык кызматына укук коргоо органынын статусун берүүнү сунуштап жатат. Тиешелүү токтом ченемдик-укуктук актылардын долбоорлорун коомдук талкуулоонун бирдиктүү порталына илинди.
Ага ылайык, аталган кызматтын айрым бөлүмдөрүнө укук коргоо органынын макамы берилет. Документтеги демилгелердин негизгилери төмөнкүлөр:
Салык кызматынын "укук коргоо органы статусуна ээ" кызматкерлери ок атуучу курал жана атайын каражаттарды (кызматтык тапанча, кийим, коргоо каражаттары) алып жүрө алышат. Бул үчүн алар ички иштер кызматкерлери сыяктуу атайын окутуудан өтүшөт;
Салык кызматынын өзүнүн алдын ала тергөө органы түзүлөт. Ал салык тармагындагы кылмыштарды (салык төлөөдөн качуу, жалган эсеп-фактуралар, контрабанда ж.б.) териштирүүгө укуктуу болот. Ошондой эле сотко чейинки өндүрүштү жүргүзүп, кылмыш ишин тергөө этаптарына чейин жеткирет;
кадр тандоо жана дисциплина маселелери толук бойдон укук коргоо системасына окшоштурулат. Конкурстар, кадрлар резерви, кызматтык иликтөөлөр ички иштер органдарынын тартибине ылайык жүргүзүлөт. Салык кызматынын укук коргоо бөлүмү үчүн өзүнчө дисциплинардык устав жана окутуу тартиби киргизилет. Окутуу үчүн Ички иштер министрлигинин академиясы аныкталды;
оперативдик-издөө иш-аракеттерине укук берилет. Эми бул орган, ыкчам-иликтөө жүргүзөт, маалымат чогултат, жашыруун ыкмалар менен иштейт. Укук коргоо органы катары кылмыш иштерин каттайт жана кылмыштардын бирдиктүү реестрине киргизет.
Белгилей кетсек, бул функцияны буга чеийн ИИМ же УКМКнын кызматкерлери аткарып келген. Мындай чечим аркылуу өкмөт салыктык мыйзам бузууларга каршы күрөштү күчөтүү, көмүскө экономиканы азайтуу, мамлекеттик киреше булактарын коргоо, салык, бажы жана башка көзөмөл органдарынын ишин координациялоону максат кылууда.
