Мамытов: АКШ саясий эле эмес, экономикалык жактан да Европаны чөктүрүүдө
© Sputnik / Асель Сыдыкова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов экономикадагы протекциялык саясатты кармануунун келечегине саресеп салды.
АКШ кайрадан өндүрүштөгү биринчи өлкө болууга далалаттанууда. Негизги атаандашы катары Кытайды көрүп жатат. Мунун өзү Американын экономикалык жактан Чыгыш өлкөсүнөн артта калып баратканын моюндаганы десек болот. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, АКШ учурда протекциялык саясат жүргүзүү менен Европанын экономикасын да чөктүрүүдө.
"Дональд Трамп өлкөдө кайрадан өндүрүштү жандандырам, жергиликтүү өндүрүшчүлөрдү колдойм деген ураан менен президенттик тактыга жетти. Келген күндөн тарта эле бул убадаларын ишке ашырууга белсенүүдө. Сырттан кирген товарларга салыкты көбөйтүп, протекциялык саясат жүргүзүү менен ал, албетте, ички өндүрүшчүлөрдү колдоп жатат. Бирок негизги атаандашы болгон Кытай мындан 50-70 жыл бир топ экономикасын күчтөп алганы аны түйшөлтүүдө. Ошондуктан АКШнын Кытайга жана башка экспорттук мамлекеттерге протекциялык саясат жүргүзүүсү Европанын ансыз да чөгүп бараткан экономикасына чоң кедергисин тийгизет. Мындан Кытай деле утуп кетпейт. Анткени экономикада протекциялык саясаттын мүнөзү ушундай. Бири-бирине атаандашып улам түрдүү талаптарды коюп, натыйжада баа жогорулап, инфляция күчөп, тарыхта керек болсо согушка чейин алып келген учурлар бар. Протекциялык экономикалык саясат — мына ушундай соода согушуна алып келүүсү мүмкүн болгон одоно жол. Негизи эле АКШ өндүрүшү начарлап бара жатканда протекциялык саясат жүргүзүп, жандандырып алган соң либералдык, ачык экономика деп кубулуп турган өлкө. Мунун өзү Америка бардык тармактарда эле кош стандарттуулукка ыктаган мамлекет экенин айгинелейт. Кытайдын Америкадан айырмасы — алар бардык багытта агрессиядан качышат. Ошондуктан да учурда дүйнөнүн башка мамлекеттерин соода жолу менен багындырууга аракети күч. Америка өзүнүн соолуп бараткан өндүрүшүн жандандырууда Кытай сыяктуу жумшак күчтү да колдонуусу зарыл. Антпесе эки соода гигантынын атаандашуусу дүйнөлүк экономиканы чайпалтып коюшу ыктымал", — деди Мамытов.
Ал бардык эле өлкөлөргө экономикасы солгундап баратканда протекциялык саясат жүргүзүү керектүү жол болорун, бирок аны өтө кылдаттык менен жасоо зарылдыгын кошумчалады.
