Кыргызстандын жарандыгы кайсы учурда берилет же алынат? Мыйзамга кирген өзгөртүү
Жазылуу
БИШКЕК, 20-мар. — Sputnik. Президент Садыр Жапаров “Кыргыз Республикасынын жарандыгы жөнүндө” мыйзамга кол койду. Бул тууралуу мамлекет башчынын маалымат кызматынан кабарлашты.
Мыйзам Жогорку Кеңеш тарабынан 6-февралда кабыл алынган. Ал жарандык маселелерди жөнгө салуу жана мыйзамдагы карама-каршылыктарды жоюу максатында иштелип чыккан.
Мыйзамга киргизилген негизги өзгөртүүлөр:
ата-энесинин бири КР жараны болсо, бала туулган жерине жана башка өлкөнүн жарандыгы бар болгонуна карабастан кыргызстандык деп эсептелет. Жарандыктан баш тартуу боюнча арыз берилгиче күчүндө болот;
этникалык кыргыздардын баласы Кыргызстанда төрөлсө КР жараны болот;
Кыргыз ССРинде, Кыргыз Республикасында төрөлсө жана/же мурдагы СССРдин жараны болсо да кыргызстандык болуп саналат;
чет мамлекеттин жарандыгы бар мекендештер (КРдин мурдагы жарандары) КР жарандыгын жөнөкөй тартипте калыбына келтирүү өтүнүчү менен кайрылууга укуктуу;
жарандыгы жоктор (туулгандан бери документсиз жүргөндөр) да жашоо мөөнөтү жөнүндө шарттарды көрсөтпөстөн КР жарандыгын калыбына келтирүү жөнүндө өтүнүч берүүгө укуктуу.
Кайсы учурда жарандыктан чыга албайт?
мамлекеттин же башкалардын алдында аткарылбаган милдеттери болсо КР жарандыгынан чыгаруудан баш тартууга негиз болот;
укук коргоо органдары тарабынан кылмыш иши боюнча айыпталуучу катары тартылса же ага карата күчүнө кирген соттун өкүмү болсо КР жарандыгынан чыгаруудан баш тартууга негиз болот;
КРдин улуттук коопсуздугунун кызыкчылыктарына каршы келген учурда жарандыктан чыгаруудан баш тартууга негиз болот;
чет өлкөлүк адам Кыргызстандын жарандыгын алып, өлкөнүн улуттук коопсуздугуна коркунуч келтирсе же чет мамлекеттин учурдагы аскердик кызматында, укук коргоо органдарында же атайын кызмат органдарында кызматта турса жарандыгы жокко чыгарылат. Укук коргоо органдарынын өтүнүчү жана атайын комиссиянын бүтүмү менен кыргыз паспортунан айрылат.
