Абдырахманов: Улуттук университеттин бюджети алгач ирет 1 млрд. сомго чыкты
"Өлкөдө беш ЖОЖго өзгөчө макам ыйгарылып, 2027-жылга чейин аткарууга бир топ милдеттер тагылган. Бул кадамдар министрлер кабинетинин билим берүү жана илимдин сапатын жакшыртуу, көтөрүү максатында жасап жаткан иш-аракеттерине кирет. Ошол өзгөчө макам берилген беш окуу жайы консорциум түзүп, алдыдагы беш жылдык иш пландарыбызды бекиткенбиз. Бул кирип жаткан саамалык болгондуктан, албетте, биргелешип иштесек жеңилирээк болчудай. Ооба, беш университеттин деңгээли бирдей эмес экен. Ошол өзгөчөлүктөрдөн улам да ар бирине өзүнчө берилген тапшырмалар бар, мындан сырткары, баарыбызга бирдей коюлган талаптар жана мүмкүнчүлүктөр бар. Мисалы, өзгөчө статус алган беш окуу жайы тең 2027-жылга чейин дүйнөдөгү алдыңкы жүздүктөгү ЖОЖдордун катарына кирип калуусу шарт. Ошону менен бирге эле бардыгыбызга экономикалык эркиндик берилип жатат. Тактап айтканда, окуу жай өзү тапкан каражатын мындан ары өзү чечим чыгарып колдонуп, жоопкерчилигин да өзү алат. Ал эми мен жетектеп турган улуттук университетке жекече коюлган милдеттемелердин бири атайын эсепке топтолгон каражаттын киреше бөлүгүн быйылкы окуу жылына карата 1 миллиард сомго, ал эми 2027-жылга чейин 2,5 миллиардга көтөрүү болчу. Биз бул талапты аткардык. Алдыда жыл сайын киреше бөлүгүн 500 миң сомдон көбөйтүп турууга жетишибиз зарыл", — деди Абдырахманов.
