Асан кызы: быйыл өлкө ЖОЖдорунда 6000 бюджеттик орун болот
© Sputnik
Жазылуу
Жогорку, орто кесиптик жана жогорку окуу жайдан кийинки билим берүү башкармалыгынын башкы адиси Айнура Асан кызы быйыл келишимдик орундарга кабыл алынуучу абитуриенттердин саны чектелбей турганын айтты.
Жалпы республикалык тестирлөөнүн жыйынтыгы боюнча 2023-2024-окуу жылына жогорку окуу жайларга абитуриенттерди тандоо жана кабыл алуу 17-июлда башталат. Бул тууралуу Айнура Асан кызы Sputnik Кыргызстан радиосунун эфиринде маек куруп жатып билдирди.
Асан кызы: быйыл өлкө ЖОЖдорунда 6000 бюджеттик орун болот
Анын айтымында, өлкө аймагында 79 жогорку окуу жай болсо, анын 28и мамлекеттик окуу жай болуп эсептелет.
"ЖОЖдорго өтүү үчүн сынакка катышууну каалаган абитуриенттер өтүнмөлөрдү жана документтерди "Абитуриент онлайн" электрондук автоматташтырылган маалыматтык системасы аркылуу тапшырат. Бул жолу жогорку окуу жайларга кабыл алуу төрт этапта жүргүзүлөт. Биринчи тур 17-июлда 8:00дө башталып, 19-июлда 14:00дө аяктайт. Экинчи тур 24-26-июль күндөрү, үчүнчү тур 31-июлдан 2-августка чейин жана төртүнчү тур 7-9-август күндөрү деп белгиленди. Быйыл өлкө боюнча ЖОЖдордо 6000 бюджеттик орун бар. Жогорку окуу жайларга гранттык негизде жана келишим боюнча акы төлөнүүчү окутуунун бардык формаларына негизги тесттин босого баллы жылдагыдай эле 110, предметтик тесттердики 60 бойдон калтырылды. Педагогика багыттары боюнча бюджеттик орунга тапшыра тургандар үчүн негизги тесттин босого баллы 115, предметтик тест 60 болуп бекиди. Акы төлөнүүчү окутуунун бардык формаларына негизги тест боюнча 110, предметтик тест – 60 балл. I жана II топтогу майыптыгы бар жарандарды кабыл алуу үчүн (медициналык жана фармацевтикалык адистиктерден тышкары) бюджеттик орундарга негизги тест 105, келишим боюнча акы төлөнүүчү окутуунун бардык формаларына негизги тест 100 балл болуп бекитилди. Андан тышкары, айыл чарба тармагындагы адистиктерге бюджеттик жана келишимдик окуу түрүнө тапшыруу үчүн чек 100 баллдан башталат", — деди Асан кызы.
Ал быйыл келишимдик орундарга кабыл алынуучу абитуриенттердин саны белгилүү бир сан менен чектелбей турганын (мисалы, журналист адистигине аз абитуриент өтсө, тарыхчыларга көбүрөөк студент кабыл алынат) кошумчалады.
