Өспүрүм кыздардын жетилүүсү тууралуу мобилдик тиркеме ишке кирди
© Sputnik / Асель Сыдыкова
Жазылуу
"Айкын багыт" коомдук фондунун долбоорлорунун программалык координатору Гүлзат Мукалиева Кыргызстанда биринчи жолу өспүрүм кыздардын жетилүүсү жана ден соолугу тууралуу мобилдик тиркеме ишке киргизилгенин айтты.
Өлкөдө өспүрүм кыздардын айыз циклине көз салуу жана ага байкоо салуу үчүн "Oky" мобилдик тиркемеси иштелип чыкты. Азыркы учурда мобилдик тиркеме дүйнөнүн 13 өлкөсүндө колдонулат. Бул жерден өспүрүм кыздар айыздан тышкары жетилүү процесси, гигиена жана кыз менен эркек баланын айрмачылыгы тууралуу окуп, билишет. Бул тууралуу Гүлзат Мукалиева Sputnik Кыргызстан радиосунун эфиринде маек куруп жатып билдирди.
Өспүрүм кыздардын жетилүүсү тууралуу мобилдик тиркеме ишке кирди
Анын айтымында, кыздардын айыз тууралуу маалыматынын аздыгы аларды ашыкча стресске кептейт.
"Бир нече ай бою биз Кыргызстандын булуӊ-бурчундагы 100дөн ашык кыздар менен алардын айыз тууралуу түшүнүгү, коркуусу, үмүттөрү жана жашоосу тууралуу сүйлөшүп, тиркеме түзүп чыктык. Албетте, долбоорго билим берүү жана медицина тармагынын адистери да өз салымын кошушту. XXI кылымда жашап жатканыбызга карабай, тилекке каршы, адамдар аялдардын физиологиясын талкуулоону уят деп эсептейт. Мындайча айтканда, ал жөнүндө сөз кылуу жийиркеничтүү, адепсиз деп кабылданып, айыз тууралуу апалар кыздарына кантип айтып берүүнү да билишпейт. Кыздар ал тууралуу көбүнчө курбулары же эжелеринен сурап билишет. Апаларына айткандан коркушат же тартынышат. Кыздарга өз учурунда туура, жакшы маалымат берилбегендиктен аларды организминдеги өзгөрүүлөр коркутуп, арасында "өлүп каламбы" деп ойлогондор бар экен. Бизде эле эмес, дүйнөнүн башка мамлекеттеринде да бул дагы деле жабык тема. Бардык аялдардын жана кыздардын айызы болот. Бул табигый нерсе. Бирок кыздар дагы эле мындан уялышат, маалымат жетишпейт. Интернеттен ишенимдүү, сапаттуу жана актуалдуу маалыматты табуу кыйын болушу мүмкүн. Себеби интернет желеси тастыкталбаган маалыматка толгон. Ошондуктан "Окy" тиркемеси кыздарга айыз учурунда өзүн ишенимдүү сезүүгө, өз денеси жана жашоосу жөнүндө негиздүү чечим кабыл алуу үчүн эмне кылуу керек экенин билүүгө жардам берүү үчүн түзүлгөн. Тиркеме айыз цикли тууралуу жеке календарды, улуу эжеси менен сүйлөшө турган чат-ботту, кыздардын чоңоюусу тууралуу пайдалуу маалымат топтогон энциклопедияны камтыйт. Тиркемеде кыздарга арналган оюндар жана кызыктуу функциялар бар", — деди Мукалиева.
Ал "Oky" тиркемеси Android жана App Store түзүлүштөрүндө орус, кыргыз тилдеринде жеткиликтүү экенин кошумчалады.
