Исаев: тумоонун күчөгөн учуру декабрь-январь айларында күтүлүүдө
© Sputnik / Асель Сыдыкова
Жазылуу
Чүй облусунун санитардык-эпидемиологиялык көзөмөлдөө борборунун жугуштуу ооруларды көзөмөлдөө бөлүмүнүн башчысы Акылбек Исаев акыркы эки жумада Чүй облусу боюнча эпидемиологиялык абал курчуганын айтты.
2022-жылдын 11 айында Чүй облусунда 40 миӊге жакын курч респиратордук инфекция менен ооруган бейтап катталды. Бул тууралуу Акылбек Исаев Sputnik Кыргызстан радиосунун эфиринде маек куруп жатып билдирди.
Исаев: тумоонун күчөгөн учуру декабрь-январь айларында күтүлүүдө
Анын айтымында, лабораторияга барып анализ тапшырып, тумоонун кайсы түрү экенин аныктоо зарылчылыгы жок.
"Акыркы эки жумада Чүй облусу боюнча эпидемиологиялык абал курчуду. Жыл сайын ушул учурда сасык тумоонун сезону башталат. Оорунун эӊ көп катталган учуру декабрь-январь айларында күтүлүүдө. Бүгүнкү күндө Кыргызстандан тышкары коӊшу мамлекеттерде, ошол эле Россияда чочко тумоосу менен жабыркаган бейтаптардын көбөйгөнү байкалууда. Оорунун жайылышына тышкы миграция себеп болууда. Бул чочко тумоосу 2009-2010-жылдары дүйнө жүзүндө пандемияны шарттаган. Ага каршы эмдөөнүн натыйжасында эпидкырдаал турукташкан. Ошондон бери жыл сайын эле чочко тумоосу катталып турат. Бейтаптар ооруну сасык тумоо сымал эле көтөрүп жатат. Качан гана лабораторияда анализге тапшырганда тумоонун кайсы түрү экени аныкталып калат. Белгилери грипптин А жана Б түрүнө окшош эле. Үстүбүздөгү жылдын октябрь айынан бери Кыргызстанда чочко тумоосу менен ооруган 34 учур катталса, анын сегизи Чүй облусунда аныкталды. Негизи өнөкөт оорусу бар адамдар үчүн вирустардын баары эле коркунучтуу. Ошондуктан жылына тобокел тобундагы адамдарды эмдөөдөн өткөрөбүз. Алсак, Чүй облусу боюнча 16 миӊге жакын адам Россиянын Гриппол Плюс вакцинасы менен эмделди. Экинчи этапта элге 5000 доза GC Flu (мында куш, чочко тумоосуна каршы антигендери бар) вакцинасы сайылды", — деди Исаев.
Ал тумоологон чоӊ адамдар дарыгердин консультациясы менен үй шартында дарыланса болорун, ал эми балдарды өз алдынча дарылабастан үй-бүлөлүк дарыгерге алып барып көрсөтүү керектигин кошумчалады.
