Абдыракманова: жыл соңуна чейин эски ККМдерди алмаштыруу зарыл
© Sputnik / Асель Акматалиева
Жазылуу
Салык кызматынын ККМди контролдоо бөлүмүнүн башкы инспектору Жаннат Абдыракманова өлкөдө 57 миң ККМ колдонуучу бар экенин маалымдады.
Жыл соңуна чейин техникалык талаптарга туура келбеген ККМдерди алмаштыруу зарыл. Бул тууралуу Жаннат Абдыракманова Sputnik Кыргызстан радиосуна маек куруп жатып билдирди.
Абдыракманова: жыл соңуна чейин эски ККМдерди алмаштыруу зарыл
Анын айтымында, жыл башынан күчүнө кирген Салык кодексинин жаңы редакциясында ККМге карата атайын техникалык талаптар көрсөтүлгөн.
"Онлайн функциясы менен ККМ 2016-жылдан баштап киргизилүүдө. Бирок ошол 2016-жылы орнотулган аппараттарда фискалдык маалыматтарды жөнөтө турган атайын жабдык (УПВД) өзүнчө жасалып, мөөнөтү үч жылга эсептелген. Ошолорду алмаштыруу зарыл. Учурда өлкөдөгү 57 миң ККМ колдонуучунун ичинен 27 миңге чукулунуку атайын техникалык талаптарга ылайык келет. Калганын ушул жылдын соңуна чейин алмаштыруу зарыл. Пандемия, дүйнөдөгү саясий абалдан улам ККМ базарында дефицит жана наркы кымбат болууда. Мыйзамга ылайык, бул аппараттарды салык төлөөчү өз каражатына сатып алышы керек. Бул көйгөйлөрдү чечүү үчүн бюджеттин эсебинен 10 миң гибриддик (накталай жана накталай эмес төлөм кабыл алган) ККМ сатып алынган. Анын ичинен 2 600 аппарат учурда ишкерлерге таратылды. Калганы дагы таратылууда. Бул ККМдер акысыз берилет, бирок убактылуу. Анткени салык төлөөчү ишкердигин жапса же ал банкрот болсо кайра Салык кызматына тапшырышы шарт. Ал кезекте турган кийинки ишкерге өткөрүп берилет. Мындан тышкары, ККМди техникалык тейлөө үчүн каражат төлөнөт. Анын наркы сүйлөшүүлөрдүн натыйжасында учурда 600-700 сомдон 250-350гө төмөндөтүлдү", — деди Абдыракманова.
Ошондой эле ал 9 000 гибриддик ККМ үч мамлекеттик банкта таратылып жатканын кошумчалады.
