Асан кызы: учурда ЖОЖдордо 50 миңден ашык бош орун бар
© Sputnik / Асел Акмат
Жазылуу
Жогорку, орто кесиптик жана жогорку окуу жайдан кийинки билим берүү башкармалыгынын башкы адиси Айнура Асан кызы жайкы ЖРТда абитуриенттердин 57 пайызы гана босого баллдан өтө алышканын айтты.
Быйыл Кыргызстанда биринчи жолу өлкөнүн жогорку окуу жайларына кышкы кабыл алуу жүргүзүлөт. Эми мындан ары да ЖРТ эки ирет өткөрүлүп турмакчы. Бул тууралуу Айнура Асан кызы Sputnik Кыргызстан радиосунун эфиринде маек куруп жатып билдирди.
Асан кызы: учурда ЖОЖдордо 50 миңден ашык бош орун бар
Анын айтымында, бюджеттик орундар жайкы кабыл алуу кампаниясына бөлүнгөн бюджеттен каржыланат, андыктан абитуриенттер кышында акы төлөнүүчү окууга гана тапшыра алышат.
"Бул идея эки жылдан бери көтөрүлүп келе жатат. Анын үстүнө жайкы ЖРТда абитуриенттердин 57 пайызы гана босого баллдан өтө алды. Билим берүү министрлиги жогорку кесиптик билим алуу мүмкүнчүлүгүн кеңейтүү максатында республиканын жогорку окуу жайларына жылына эки жолу кабыл алуу механизмин иштеп чыкты. Кышкы кабыл алуу жайкы кабыл алуудан кийин бош калган келишимдик орундарга гана жүргүзүлөт. Демек, бюджеттик орундар болбойт. Бул жолу 49 жогорку окуу жайга, анын ичинде 17 мамлекеттик университетте контракттык бош орундарга кабыл алуу жүргүзүлөт. Кабыл алуу жүргүзүлүп жаткан окуу жайлардын, андагы факультет, кесиптик багыттардын тизмеси менен Билим берүү министрлигинин сайтынан таанышууга болот. Себеби бул кабыл алууда сиз каалаган жогорку окуу жай, багыттар жок болуп калышы мүмкүн. Мисалы, КММАда азыр бош орундар жок болгондуктан кышкы кабыл алууга катышпайт. Азыр окуунун бардык формалары боюнча (күндүзгү, сырттан, кечки окуу формалары жана магистратура) 50 миңден ашык бош орун бар. Каттоодон өтүүгө орто билими жөнүндө аттестаттары же орто кесиптик билими жөнүндө диплому бар бардык адамдарга уруксат берилет. Жазында ЖРТдан босого баллдан төмөн балл алган абитуриенттер дагы тестти кайра тапшыра алышат. Мектептердин 11-классынын же техникум, колледждердин бүтүрүү (акыркы) курстарынын окуучулары, жогорку окуу жайларынын студенттери катталбайт. Окууга кабыл алынган студенттер кышкы каникулдан кийин биринчи семестрин окуп баштайт. Демек, күздөн баштап окуган группаларга кышкы мезгилде кабыл алынган студенттер кошулбайт. Алар үчүн жеке график түзүлөт жана окуу жылы да алты айга кеч аяктайт", — деди Асан кызы.
Ал мындай жаңычылдык жогорку билим алууну пландап, бирок тигил же бул себептерден улам жайында окууга өтө албай калгандардын ыңгайлуулугу жана убактысын үнөмдөө үчүн киргизилип жатканын кошумчалады.
