Сот, депутат, медиги бар. УКМК диплому жасалма деп шектелгендерди ачыктады
12:48 14.03.2022 (Жаңыртылды: 12:49 14.03.2022)
Жазылуу
Атайын кызмат жасалма диплом алып, анысын колдонуп жүргөн кишилерди ыктыярдуу түрдө атайын кызматка кайрылууга же жумуштан өз каалоосу менен кетүүгө чакырды.
БИШКЕК, 14-мар. — Sputnik. УКМК кош жарандуулук жана жасалма диплом алган мамлекеттик кызматкерлерди текшерүү иштери уланып жатканын айтып, шектелип жаткандардын санын ачыктады.
Жасалма диплом колдонууга шектелгендер:
Жогорку Кеңештин төрт депутаты;
Жогорку Кеңештин аппаратынын бир кызматкери;
Шаардык кеңештин үч депутаты;
Эки судья;
Эсеп палатасынын бир аудитору;
Ички иштер органдарынын 10 кызматкери;
УКМК Чек ара кызматынын бир кызматкери;
Финансы министрлигине караштуу Мамлекеттик салык кызматынын үч кызматкери;
Тышкы иштер министрлигинен алты кызматкер;
Экономика министрлигинен эки кызматкер;
Транспорт министрлигинен үч кызматкер;
Айыл чарба министрлигинин төрт кызматкери;
Санариптик өнүктүрүү министрлигинин бир кызматкери;
Жаратылыш ресурстары, экология жана техникалык көзөмөл министрлигинин бир кызматкери;
Дин иштери боюнча мамлекеттик комиссиянын бир кызматкери;
Бир медик;
Билим берүү тармагынан 17 кызматкер;
Соцфонддун бир кызматкери;
Банктын эки кызматкери;
Муниципалдык кызматтын төрт кызматкери;
Муниципалдык аймактык башкаруунун бир адиси;
Президенттин облустагы ыйгарым укуктуу өкүлүнүн орун басары;
Бир мэр;
Бир экс-мэр;
Бир вице-мэр;
Шаардык кеңештин бир кызматкери;
Бир аким;
Жети айыл башчысы;
Айыл башчынын эки орун басары;
Айыл өкмөтүнүн жети кызматкери;
Айылдык кеңештин беш депутаты.
Мындан сырткары, кесиптик лицейдин окуучуларына мыйзамсыз диплом берүү боюнча коррупциялык схема текшерилип жатканы айтылды.
"Түшүндүрүү иштеринин натыйжасында тогуз адам өз каалоосу менен дипломун тапшырса, 16 киши өз эрки менен жумуштан кеткен. 12 мамлекеттик кызматкердин чет элдик жарандыгынын бар-жогу текшерүүгө алынды", — деп жазылат маалыматта.
УКМК жасалма диплом алып, анысын колдонуп жүргөн адамдарды ыктыярдуу түрдө атайын кызматка кайрылууга же жумуштан өз каалоосу менен кетүүгө чакырды.
