Нурматов: гепатиттин тарашы табияттын адамга жообу десек болот

"Вирустук гепатит оорусунун тездик менен тарашы чынында чоң көйгөй жаратууда. Себеби адамдар өз ден соолугуна жоопкерчиликсиз мамиле кылып, соо турган жерин кестирип, ар кандай косметологиялык операцияларды, сулуулук процедураларын жасатып жатышат. Ошол эле маникюр, педикюр, тиш доктурдан жугуп калбайт деп эч ким кепилдик бере албайт. Жыныстык жол менен оору илештиргендерде деле ушул жоопкерчиликсиздик алгачкы себеби бойдон калууда. Бирок бул тууралуу туберкулез же ВИЧ/СПИД илдеттери сыяктуу дүйнөлүк деңгээлде айтылбайт. Анткени Европа, Америка сыяктуу өлкөлөр бул вирустан коркпойт. Аларда вирустук гепатитке каршы эмдөө жолго коюлуп, улуттук программасына киргизилген. Андыктан аталган өлкөлөргө бул илдет коркунуч алып келбейт. Ал эми бизде абал башка. Жылдан-жылга вирустук гепатитке кабылгандардын саны өсүп жатса, өтүшүп кеткен формасындагылар андан көп катталууда. Жыйынтыгында келип боор циррозуна же ракка кабылып, чет өлкөдөн кымбат турган операция жасатуу муктаждыгы жаралууда. Вирустук гепатитке каршы эмдөө 2012-жылдан кийин төрөлгөн балдарга милдеттүү түрдө акысыз жүргүзүлүп келет. Андыктан бул курактагы балдардан гепатиттин В, С же D түрүнө кабылгандар дээрлик жок. Арасынан бирин-серин чыгышы мүмкүн, алар да кандайдыр бир себептер менен ымыркай кезинде албай калгандар. Көйгөй андан улуу муундун арасында курч. Андыктан чоң кишилер оорунун алдын алуу үчүн өмүрүндө бир ирет эмдөөдөн өтүп, өзүнүн организмин гепатитке каршы антитело менен камсыздап алганы дурус", — деди Нурматов.