БИШКЕК, 24-авг. — Sputnik. Афганистандын байланыш жана маалымат технологиясы боюнча мурдагы министри Сайед Ахмад Шат Саадат эми Лейпцигде курьер болуп иштеп жатат. Бул тууралуу EHA News маалымат порталы билдирди.
Маалыматка караганда, экс-министр Lieferando жеткирүү кызматында эмгектенип, велосипед менен пицца ташыйт.
Afghan minister now delivering pizza in #Germany
— EHA News (@eha_news) August 22, 2021
▪️#Afghanistan's former communications minister Sayed Ahmad Shah Saadat is now a driver for the Lieferando delivery service in Leipzig. pic.twitter.com/4SpQPHGrZm
Leipziger Volkszeitung гезити жазгандай, 2018-жылдан бери ал президент Ашраф Ганинин алдындагы министрлер кабинетинин курамында болчу. Сайед Ахмад Шат Саадат айыл жерлеринде мобилдик байланышты кеңейтүү тармагын карап келген. 2020-жылы Ганинин өкмөтү аны отставкага кетүүгө мажбур кылган. Себеби Саадат өзү башкарган министрликтин каражатын "Талибан"* кыймылы менен күрөшүүгө багытталган мамлекеттик стратегияга берүүдөн баш тартып койгон. Жыйынтыгында экс-министр Германияга кетип, ошол жакта жашап калган.
Афганистандагы кырдаал
Бир нече апта мурда Америка өз аскерлерин чыгарып кете баштаган соң Афганистанда абал кескин курчуган. Талибдер бир катар ири шаарларга кол салып, басып алышкан. 15-августта согушкерлер өлкөнүн бардык чек ара өткөрүү жайларын көзөмөлгө алып, президенттик сарайга киргенин жар салган.
Ал арада Панджшер аймагы талибдерге каршылык көрсөткөнү айтылып, вице-президент Амрулла Салех өлкөнүн убактылуу президенти экенин билдиргени маалым болду.
"Талибан"* — Кыргызстанда жана башка мамлекеттерде диний-экстремисттик уюм катары тыюу салынган кыймыл.
