БИШКЕК, 18-окт. — Sputnik. Түрк дарыгери Эндер Сарач дары-дармектин жардамы жок эле кандагы начар холестеринди азайтуунун жолдорун айтып берди. Адистин кеңешин РИА Новостиге жарыялады.
Сарачтын айтымында, пандемия учурунда адамдар аз кыймылдап, начар тамактанып, натыйжада канда холестерин көбөйүп кеткен.
"Кандагы начар холестериндин деңгээлин азайтуу үчүн ичимдик менен чылымдан баш тарткан оң. Ошондой эле дене тарбия көнүгүүлөрүн жасап, көп кыймылдаган жакшы. Мындан сырткары, авокадо, жүзүмдүн данектери, чай, жаңгактын түрү жана балык холестеринди дары-дармектин жардамы жок эле азайтууга жардам берет", — деди адис.
Дарыгер тамак рационуна соя буурчактарын жана цитрус азыктарын кошуу да пайдалуу экенин кошумчалаган.
