БИШКЕК, 25-июл. — Sputnik. Орто Азиядагы мамлекеттердин ичинен Казакстан коронавирус жуктуруп алгандардын саны боюнча алдыга чыкты. Учурда илдет 80 226 кишиде аныкталганы Жон Хопкинс университетинин сайтында жазылган.
Sputnik Казакстан агенттигинин жазышынча, бир суткада оору 1 740 адамда аныкталган. Ал эми жалпы айыккандар 51 260 болсо, 585 киши көз жумду.
1-августтан тарта Россия менен Түштүк Корея аба каттамдарын жандантышы ыктымал
Жуктургандардын саны боюнча Кыргызстан экинчи сапта. Бүгүнкү статистиканы эсепке алганда коронавирус жалпы 32 124 адамдан табылган. Анын ичинен 19 203 бейтап ооруну жеңсе, 1 249у көз жумган.
Ал эми коңшу Өзбекстанда соңку учурда ооругандардын саны өскөнү байкалууда. Буга байланыштуу бийлик 1-августтан тарта карантиндик чараларды узартууну карап жатат. Ушул тапта оору 19 653 адамда аныкталып, 107 киши көз жумду.
Тажикстанда болсо 7 104 киши дартка чалдыгып, анын 58и көз жумду.
Орто Азия мамлекеттеринин ичинде Түркмөнстан "таза" экендигин белгилеп келет.
Ал эми дүйнө жүзүндө бул илдетти 15 745 359 киши илээштирип, тилекке каршы, 639 891 оорулуу өтүп кетти.
