БИШКЕК, 1-июн. — Sputnik. Нарында бейтаптар чатырларга жатып дарыланбайт. Бул тууралуу Саламаттык сактоо министрлигинин Нарын облусундагы координаторунун убактылуу милдетин аткаруучу Айнура Акматова билдирди.
Буга чейин Telegram-каналдардын биринде "Нарында бейтаптардын көптүгүнөн аларды оорукананын короосундагы чатырларда кабыл алып жатат" деген маалымат тараган.
Бул кабарды Акматова төгүндөп, чатырлар коронавирус жуктуруп алгандар менен башка оорусу бар бейтаптарды иргөө максатында тигилгенин айтты.
"Оорукананын короосундагы чатырларда коронавирус жуктургандар менен "тазаларды" иргейбиз. Анда дарыгерлер бейтаптардан коронавирус аныкталгандар менен байланышта болгон-болбогонун сурап, дене табын текшерет. Эгер вируска шектелсе, анализ алып жыйынтыгы чыккычакты ал адам обочолонуп турат. Анализи таза чыкса, таза зонага жаткырылат. Эгер вирус табылып калса, анда коронавирус жуктурган бейтаптар жаткан бөлүмгө жөнөтүлөт", — деди Акматова.
Ал бейтаптар чатырларда жатып дарыланбай турганын баса белгиледи. Аны менен кошо антисанитариялык абал туурасында кошумча маалымат берди.
" Оорукананын айланасында таштанды чыгарылбай толуп кетиптир. Алты КамАЗ чыкты. Анын баарын чыгардык. Ажаткананын жоктугу жана таштандынын көп болушу жугуштуу ооруларды күчөтөт. Мындан улам азыркы тапта оорукананын сыртына кызматкерлер үчүн ажатканалар курулуп жатат", — деди Акматова.
Эске салсак, буга чейин министрдин буйругу менен Саламаттык сактоо министрлигинин Нарын облусундагы координатору Муратбек Аляскаров кызматтан четтетилген. Анын милдетин Саламаттык сактоо министрлигинин алдындагы Коомдук саламаттык сактоо башкармалыгынын башчысы Айнура Акматова аткарып жатат.
Бүгүнкү күндө Нарында коронавирус жуктуруп алган 372 учур катталды. Бул Бишкектен кийинки эле эң жогорку көрсөткүч.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген карантиндин мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
