Өмүров: кесиптик окуу жайлар эл аралык стандарттагы адистерди даярдайт
"Инклюзивдүү өнүгүү үчүн көндүмдөр: секторду өнүктүрүү" программасынын алкагында кесиптик окуу жайлардын бүтүрүүчүлөрү толук кандуу бир кесиптин ээси болуп чыга турган долбоор ишке кирет. Бул тууралуу Нурлан Өмүров Sputnik Кыргызстан радиосуна маек куруп жатып билдирди.
Анын айтымында, аталган программа 15 багыт боюнча өлкөнүн сегиз кесиптик окуу жайында сынамык иретинде иштеп баштайт.
"Дүйнөлүк өнүктүрүү банкынын колдоосу менен билим берүү системасында "Инклюзивдик өнүгүү үчүн көндүмдөр" деген программанын алкагында атайын долбоор даярдалып жатат. Ага ылайык, кесиптик билим берүү секторунда реформа жасалат. Ал үчүн Эмгек жана социалдык өнүктүрүү министрлиги, Соода-өнөр жай палатасы, эмгек рыногундагы айрым мекемелер менен биргеликте бүтүрүүчүлөр кайсы көндүмдөргө, билимдерге ээ болушу керектиги аныкталып, кесиптик стандарттар иштелип чыгууда. Мындан тышкары, Бишкек, Токмок, Кара-Балта, Жалал-Абад, Ош, Каракол, Нарын, Кызыл-Кыя шаарларында жайгашкан колледждерде өндүрүштүк цехтер курулуп, студенттер тажрыйбалык билим дагы ала алышат", — деди Өмүров.
Ошондой эле ал аталган долбоордун алкагында мугалимдердин билим квалификациясы жогорулатыла турганын кошумчалады.
