БИШКЕК, 20-июн. — Sputnik. Мындан 10 күн мурда Балыкчы шаарында батуттан кулап кетип, комага түшүп калган үч жашар кыз эсине келбеген тейде чарчап калды. Бул туурасында Саламаттык сактоо министрлигинин маалымат кызматынан кабарлашты.
Буга чейин Балыкчы шаарында бөбөктү карап жаткан Борборлоштурулган оорукананын дарыгери кыз бийиктен кулагандыктан алган жарааты да абдан көп экендигин, бирок сактап калуу үчүн күрөшүп жаткандыктарын айткан.
Кырсыктуу батут 9-июнда Балыкчы шаарындагы кичи райондордун биринде шамалдан улам оодарылып кетип, бир нече бала жабыркап, эки бир тууган кыздар ооруканага түшкөн.
Балыкчы шаарынын мэриясынан окуянын кесепетин жоюу үчүн милиция кызматкерлери менен Балдарды коргоо, ата-энелерге колдоо көрсөтүү бөлүмү иштеп жаткандыгы айтылган.
