БИШКЕК, 10-июн. — Sputnik. Балыкчы шаарында шамал учурган батуттан жабыркаган үч жашар кыз комада, абалы оор, ага бүгүн операция жасалды. Бул туурасында Балыкчы шаарынын аймактык ооруканасынын хирургия бөлүмүнүн башчысы Баястан Абдразаков аймактык кабарчыга билдирди.
Эске салсак, 9-июнь күнү Балыкчыда шамал батутту учуруп кеткен. Сегиз бала жабыркаса, эки бир тууган кичинекей кыздар ооруканага түшкөн.
Үч жашар бөбөк учурда кайра жандандыруу бөлүмүндө жатат, дарыгерлердин көзөмөлүндө.
"Ички органдардын абалын аныктоо максатында бөбөктүн ичине динамикалык байкоо үчүн атайын трубка салып койгонбуз. Эртең менен кан чыгып калыптыр. УЗИден суюктук бар дегенинен операцияга алдык. Бийиктен кулагандыктан ичегилерине доо кеткен. Учурда абалы оор, алган жарааты да абдан көп. Кичинекейлердин организми күчтүү болот. Өмүрүн сактап калганга аракет кылып жатабыз", — деди Абдразаков.
Кырсык туурасында аймактык кабарчыга жабырланган кыздардын чоң атасы Беккул Абдраимов төмөнкү маалыматтарды айтып берди.
Азырынча батуттун ээсине карата арыз жазыла элек.
Ооруканадан кырсыктуу батуттун ээси делген Бактыгүл Асанкуловага жолугуп, окуянын чоо-жайын сурадык.
Ал батутту Ысык-Көлдүн жээгинде тигилген боз үйдүн жанына орнотуу максатында алгандыгын айтып берди.
"Батутту элдин баары иштетет экен, мен деле ошол ой менен алып келгем. Буга чейин 1-июнда мэриянын суроосу менен жетим балдар үчүн тигип бергем. Айт күнү да коюп бергем. Ушул эле балдар ойногон. Көлдүн жээгинде боз үйүбүз бар. 10-июнда ошол жерге алып барып коеюн дегем. Уулум эртең менен тигип, тазалап жаткан. Бала деген бала да, ойнойбуз дегенде киргизиптир. Анан эле шамал болуп, көтөрүп салды. Өзүнүн бийиктиги 15 метр, шамал учуруп, көтөрүлүп барып кырынан туруп калды. Азыр батутту уккум да келбейт", — деди Асанкулова.
Балыкчы шаардык ички иштер бөлүмүнөн бул факты Кылмыш жана жоруктардын бирдиктүү реестрине катталганын айтышты.
"Тиешелүү экспертиза дайындалды. Экотехинспекцияга бердик, ошонун жыйынтыгы менен ээсине чара колдонулат", — дешти аталган органдан.
Кыргызстанда кичинекейлердин батуттан, аттракциондон кулаган учурлары улам арбыныраак кездешүүдө. 1-июнь күнү Жалал-Абад шаарындагы Токтогул сейил багындагы аттракциондордун биринен 14 жаштагы кыз 7 метр бийиктиктен кулаган.
